علي الدمشاوي ِAli Al-dimshawy

صوتك قمر يتسرسب من سماعة التليفون فيرمي نفسه في هوا الأوضة زي فراشة بتقع في بحيرة فترسم موجات دائرية من نور في مواجهة الرؤية ؛ في النهاية و لما بيكتمل شكل وشك قمر بيكون تمامًا في حجري  ؛ صوتك معجزة !

موت عائلي -1-   نايم والمنبّه الجوّاني صاحي بيجبرك تفتح عينيك كل خمس دقايق عشان تبحلق لأحلامك وهي بتتبخر من دماغك باتجاه السقف أو تبلع ريقك أو تعدّل وضع جسمك ع السرير أو حتى تمثل نظرة ساخطة على ايد الممرضة المؤلمة  اللي بتغير كانيونة المحلول أو تسأل الطبيب السخيف عن آخر معاد للموت . -2- ما عدا أمك فإن كل الواقفين في بلكونة المستشفى مش حاسين بتقل وقع صوت العربيات على روحك ولا بسخطك على سخافة تكرار الشوارع حوالين المستشفى من غير سبب إلا الإصرار على تكديرك، وحدها أمك تقدر تحس حاجة قدام غبار الأحلام الخارج من شفايفك في هلوستك الواهنة من تأثير المخدر الطبي. -3- الطبيب المخلص كل ما هيلاحظ إنك فقت هييجي يرص مجموعة جمل النصايح حوالين أهمية امتناعك عن التدخين والانفعال والشعر وهيستخدم عبارة (طبعا انت فاهم) كلازمة لكلامه؛ فيفكرك برغبتك في القيء قصاد قصايد العامية التقليدية؛ فتندر بينك و بين نفسك إنك و انت خارج من هنا هتوقف نعشك قدام مكتبه الفخم و تولع سيجارة فرط من جيب الكفن وتسحب نفس عميق تنفخه ف وشه وتقول: -   طبعا انت فاهم يا دكتور! -4- مسابقة التدخين اللي داخلها مع الشركة الشرقية للدخان هتنت